«Төнге Велофест-2022» Казанның 1 Май мәйданыннан старт ала

Фото: Денис Гордийко

Быел Татарстан Республикасында Цифрлаштыру елына багышланган «Төнге Велофест» 13 нче августтан 14 нче августка каршы төндә узачак.

Катнашучылар 20:00 сәгатьтә 1 нче Май мәйданында җыела башлый, велоколонна 22:00 сәгатьтә кузгалып китә һәм Кремль яр буенда 00:30 сәгатьтә тәмамлый. Фестивальдә катнашу өчен 5 августтан 13 августка кадәр «Төнге велофест» сайтында теркәлергә кирәк.

Велосипедчылар төнге Казан буйлап 17 км узачак – маршрут шәһәрнең тарихи өлешен һәм аның елга арты районын колачлый. Юлда өч тукталыш планлаштырылган – «Казан» гаилә үзәге, «Ак Барс Арена» стадионы һәм Кремль яр буе.

13-14 августта “Төнге велофест” вакытында шәһәр үзәгендәге урамнар автомобильләр хәрәкәте өчен ябылачак:

13 августта 20:00 сәгатьтән 22:30 сәгатькә кадәр Кремль урамының Кремль урамы 1 нче номерлы йорттан башлап Чернышевский урамына кадәр өлеше, 20:00 сәгатьтән 23:00 сәгатькә кадәр – 1 Май мәйданы һәм Меңьеллык мәйданы юнәлешендә Ивановский авышлыгы ябыла.

21:30 сәгатьтән 22:30 сәгатькә кадәр чикләү Чернышевский урамы (Чернышевский урамының 9 нчы йортыннан Дзержинский урамының 7 нче йортына кадәр) һәм Дзержинский урамында (Чернышевский урамыннан Батурин урамына кадәр аралыгы) гамәлдә булачак.

21:30 сәгатьтән 22:40 сәгатькә кадәр Батурин урамында (Миславский урамыннан Кремль ярына кадәр өлеше) һәм Зур Кызыл урамында (Миславскийдан Батурин урамына кадәр өлеше) транспорт хәрәкәте чикләнәчәк. 

21:30 сәгатьтән 23:00 сәгатькә кадәр Меңьеллык мәйданында һәм Кремль дамбасыннан Декабристлар урамына кадәр, Декабристлар урамында бер якка хәрәкәт туктатылачак.

Хәрәкәтне чикләүнең тулы схемасы белән Казан Мэриясе сайтында танышырга мөмкин.