29 апрельдә Татар халкының һәм Татарстан Республикасының дәүләтчелеге тарихы музеенда рәссам Илдус Мортазинның «Terra Bular» күргәзмәсе ачыла

9 апрельдә Татар халкының һәм Татарстан Республикасының дәүләтчелеге тарихы музеенда рәссам Илдус Мортазинның «Terra Bular» күргәзмәсе ачыла. Күргәзмә Идел буе Болгар дәүләтендә ислам динен кабул итүгә 1100 ел тулуга һәм Россия халыкларының халык сәнгате һәм матди булмаган мәдәни мирас елына багышлана.

Күргәзмәнең исеме Венгриядә XII гасырда язылган иншадан алынган. Анда ерак Terra Bular – Биләр җиреннән болгар-мөселманнарының венгрлар җиренә күчүе турында сөйләнә. Биләр – Болгар шәһәре, мәдәни үзәк һәм үз вакытының мегаполисы.

Илдус Мортазинның картиналары Болгар иленә сәяхәткә чакырыла. Күргәзмәдә майлы буяулар белән ясалган 23 эш күрсәтеләчәк. Картиналарның төп жанрлары – тарихи һәм портрет, пейзаж һәм пастораль, баталь һәм иппик (атларга багышланган). Картиналардагы төп сюжет: болгарны Идел буена күчерү, болгар сугышчылары, тыныч тормыш, сәүдә итү, ислам динен тану. Автор эшләрендә Болгарның барлыкка килү һәм чәчәк ату вакытын данлыклап сурәтли. Болгар халкының торыш-көнкүреш рәвешен тасвирлап рәссам картиналарында билгеле бер тарихи сюжетларны мәңгегә истәлеккә калдыра. Аның әсәрләре «тормыш шатлыгы» фәлсәфәсе күзлегеннән чыгып төзелгән һәм үз эченә уңай якты хисләрне алып тора. Алар сафлык һәм яктылык белән тулы.

Түбән Кама рәссамы Илдус Мортазин – Татарстанның атказанган сәнгать эшлеклесе, Россия һәм Татарстан рәссамнар берлеге әгъзасы, Россия рәссамнары иҗат берлеге әгъзасы. Халыкара һәм Бөтенроссия күргәзмәләрендә даими катнашучы. Аның эшләре Россиянең күп кенә дәүләт коллекцияләрендә саклана.

Музейдагы күргәзмәдә «Кол Гали», «Идел буе Болгары сакчылары», «Иделдә болгарлар», «Дингез аръягындагы сәүдәгәрләр», «Тыныч күк» һәм башка картиналар күрсәтеләчәк.