«Эрмитаж-Казан» үзәгендә «Классика көннәре» фестиваленең аралык нәтиҗәләре

Апрель аенда «Эрмитаж-Казан» үзәгендә Дәүләт Эрмитажы белән берлектә оештырылган «Классика көннәре» фестивале уза. Традиция буенча, Дәүләт Эрмитажы тупланмасындагы антик сәнгать һәйкәлләренә багышланган балалар рәсемнәре күргәзмәсе төп вакыйга булачак.

Бүгенге көндә музейда 37 эш тупланган, шуларның унысы проектның инклюзив өлеше кысаларында башкарылган.

Рәсемнәр бәйгесендә катнашу өчен оештыручылар 6 яшьтән 16 яшькә кадәрге балалардан торган фокус-төркем туплады. Катнашучылар күргәзмәдә экскурсиядә булды, Дәүләт Эрмитажы тупланмасындагы Казан Кремлендә тәкъдим ителгән шедеврларны карады һәм Александр Македонский тарихы турында күп яңалыклар белде. Экскурсия тәмамлангач, балалар үз белемнәрен үзләре тирәнәйтеп бөек гаскәр башлыгы турындагы риваятьләр һәм мифлар белән танышты.

Проектның инклюзив өлеше «Мин рәссам – мин шулай күрәм» бәйгесе кысаларында иҗади дәрестә узды. Катнашучылар гаилә темасына танылган музей сәнгать әсәренең аңлатмасын ясады.

Мондый мастер-класслар бөтен ил буенча музейларда узачак. Җиңүчеләрне Россиянең 18 шәһәреннән 34 музей экспертлары сайлап алачак. Иң яхшы йөздән артык эш ноябрь аенда Мәскәү музеенда күргәзмәдә тәкъдим ителәчәк. Бәйгене оештыручы – АНО «Колесо Обозрения».

Фестиваль кысаларында шулай ук «Эрмитаж-Казан» үзәгенең социаль челтәрләрендә ораторлык осталыгы онлайн-бәйгесе уза. Бәйгедә катнашу өчен күргәзмә һәм шулай ук Александр Македонский турында мифлар һәм легендалар белән танышкан катнашучыларның фокус-төркеме җыелган.

Катнашучылар үзләренә кызыклы булган тарихны сайлап алып видеога яздырырга тиеш. Әлеге видеороликларны «Эрмитаж-Казан» үзәгенең социаль челтәрләрендә карарга һәм ошаган эш өчен тавыш бирергә, шулай ук нәтиҗәләрне белергә мөмкин.