Казан Кремлендә күрмәүче һәм начар күрүче балалар өчен «Җәйге музей лагере» узачак

2023 елның 12-17 июнендә «Казан Кремле» музей-тыюлыгында күрмәүче һәм начар күрүче балалар өчен «Җәйге музей лагере» узачак. Алты көн дәвамында мәдәни-мәгариф чарасында катнашучылар музейлар һәм күргәзмә заллары белән танышачак, махсус мастер-классларда һәм иҗади дәресләрдә катнашачак. Һәр көн балалар яңа темалар өйрәнәчәк: тарих, сәнгать, фән, һөнәрчелек һәм мәдәният. Лагерьда 10 бала катнаша.

Атна дәвамында балалар музейлар белән танышачак, мастер-классларда һәм иҗади дәресләрдә катнашачак, ә ахырында әти-әниләре белән бергә музей пикнигындагы лагерь дәвамында алган тәэсирләре белән уртаклашачак.

Проект өчен махсус мерч эшләнгән. Ул үз эченә рюкзак, панамка, футболка һәм су өчен шешәне ала. Лагерьга волонтерлар сайлап алынды һәм алар белән тренинглар үткәрелде.

Оештыручылар билгеләп үткәнчә, әлеге проект балаларны мәдәнияткә җәлеп итүгә һәм аларны музейлар белән таныштыруга, шулай ук киң җәмәгатьчелекнең игътибарын социаль инклюзия темасына җәлеп итүгә юнәлдерелгән.

Исегезгә төшерәбез, Казан Кремле Сибур компаниясенең «Яхшы эшләр формуласы» социаль инвестицияләр программасының сигезенче грант бәйгесендә җиңүче булды (бәйгегә барлыгы 590 гариза килгән; Россиянең 16 шәһәреннән 138 проект җиңүче булды. «Инклюзия» юнәлеше быел беренче тапкыр бәйгедә билгеләнде).

«Җәйге музей лагерен» ачу тантанасы 12 июньдә 10:00 сәгатьтә «Казан Кремле» музей-тыюлыгының Гавами урыннары бинасының лекториенда узачак (4 подъезд, 2 кат).