Казан Кремлендә начар күрүче балалар өчен «Җәйге музей лагере» эшли башлады

Алты көн дәвамында мәдәни-мәгариф чарасында катнашучылар музейлар һәм күргәзмә заллары белән танышачак, махсус мастер-классларда һәм иҗади дәресләрдә катнашачак.

Казан Кремлендә «Күрмәүче һәм начар күрүче балалар өчен музей инклюзив лагере» – «СИБУР» компаниясенең «Яхшы эшләр формуласы» социаль инвестицияләр программасының сигезенче грант бәйгесендә җиңүче булган проект.

«Казан Кремле» музей-тыюлыгының проект җитәкчесе Дарья Моратова сөйләвенчә, «Җәйге музей лагеренда» Казанның 172 нче мәктәбе укучылары катнаша. Лагерь 2023 елның 12-17 июнендә алты көн дәвам итәчәк һәм шәһәр паркларының берсендә зур пикник белән тәмамланачак. Лагерьның төп бурычы – балаларны Казан Кремленең музейлары, күргәзмә заллары һәм киңлекләре белән таныштыру. «Җәйге музей лагеры» тематик, аерым юнәлешкә – тарихка, сәнгатькә, фәнгә, һөнәрчелеккә, мәдәнияткә багышланачак.

«Җәйге музей лагерен» ачу тантанасында Казан шәһәре Башкарма комитеты җитәкчесе урынбасары Гүзәл Сәгыйтова, «Казан Кремле» музей-тыюлыгы директоры Илнур Рәхимов, «Казаноргсинтез» ААҖ профсоюз комитеты рәисе Светлана Кузякина, сәламәтлек мөмкинлекләре чикле балалар өчен 172нче мәктәп директоры Елена Шепынева катнашты.

Казан шәһәре Башкарма комитеты җитәкчесе урынбасары Гүзәл Сәгыйтова лагерьда катнашучыларны сәламләде: «Казан иң игелекле шәһәр булырга омтыла. Бу көчле сүзләр генә түгел, алар артында зур эш тора: шәһәрдә инклюзив үзәкләр ачыла, мәктәпләрдә инклюзив сыйныфлар үсә. Казан Кремлендә «Җәйге музей лагере» ачылу безнең өчен зур шатлык. Педагогларның балаларның йөрәкләренә ачкычларны җиңел сайлап алуын һәм бу көннәрнең катнашучыларның хәтерендә озакка калуын телим».

«Казан Кремле» музей-тыюлыгы директоры Илнур Рәхимов «Сибур» компаниясе ярдәме белән гамәлгә ашырыла торган проектның мөһимлеге турында сөйләде: «Без Казан Кремлендә «Җәйге музей лагерен» эшләтеп җибәрүебезгә шат. Бу проект безнең өчен бик мөһим булды. Мин «Казаноргсинтез» һәм «Сибур» ААҖгә рәхмәт белдерәсем килә. Соңгы вакытта без партнерлар белән күп эшлибез, һәм «Сибур»ның һәр программаның эчтәлегенә һәм аның кыйммәтләренә игътибар итүе бик мөһим».

«Казаноргсинтез» ААҖ профсоюз комитеты рәисе Светлана Кузякина «Яхшы эшләр формуласы» программасы турында сөйләде һәм лагерьда катнашучыларга яңа белемнәр һәм ачышлар теләде: «Сибур Холдинг» ААҖ 2016 елда «Яхшы эшләр формуласы» дип аталган программаны башлап җибәрде, аның исеме үзе үк күп нәрсәләр турында сөйли. «Сибур» оешмасы булган шәһәрләрдә бу программа төрле юнәлешләрдә үсеш алып бара: мәгариф, фән, мәдәният, волонтерлык, шәһәр инфраструктурасы. Казанның «Яхшы эшләр формуласы» программасын гамәлгә ашырыла торган шәһәрләр санына керүе – бик яхшы билге. Кадерле лагерьдагы балалар, һәр көнегезнең бай, кызыклы булуын телим.  Сез 1 сентябрьдә мәктәпкә килгәч дусларыгызга, укытучыларыгызга җәйге каникулларда ничек ял итүегезне рәхәтләнеп сөйләрсез. Бу атна Казан Кремлендә сезгә бик күп белем алырга насыйп булсын».

Физик мөмкинлекләре чикле балалар өчен 172 нче мәктәп директоры Елена Шепынева: «Балалар, бүген сезгә әйтеп бетергесез зур бәхет елмайды. Беренчедән, сез безнең шәһәрнең үзәгендә – Казан Кремлендә; икенчедән, сез моңа кадәр беркайчан да булмаган уникаль проектта катнаштыгыз. Бу проект гадәти түгел, сезнең өчен бай сәнгать белеме программасы әзерләнде. Сезгә биреләчәк белемнәрне һәм күнекмәләрне үзләштерегез».

Проект өчен махсус мерч эшләнгән. Ул үз эченә рюкзак, панамка, футболка һәм су өчен шешәне ала. Лагерьга волонтерлар сайлап алынды һәм алар белән тренинглар үткәрелде.

Казан Кремленең инклюзив программалар телеграмма-каналы: https://t.me/kazankremlininclusion

Белешмә

Сибурның «Яхшы эшләр формуласы» социаль инвестицияләр программасы 2016 елның 1 февралендә компания эшчәнлегенең барлык төп шәһәрләрендә эшли башлады һәм иң мөһим иҗтимагый өлкәләрне үз эченә алган җиде юнәлеш буенча гамәлгә ашырыла: шәһәрләрне үстерү, мәгариф һәм фән, спорт һәм сәламәт яшәү рәвеше, әйләнә-тирә мохитне саклау, мәдәният, волонтерлык һәм инклюзия. Программа турында тулы мәгълүмат www.formula-hd.ru сайтында бар.