«Чаян». Республика белән йөз ел бергә» күргәзмәсе 2023 елның 8 мартында ачылачак

2023 елның 8 мартында «Манеж» күргәзмәләр залында Татарстанның танылган сатира журналы «Чаян»ның йөз еллыгына багышланган күргәзмә ачылачак.

«Чаян» – бүгенге көнгә кадәр чыгып килүче, Россиянең совет чорыннан сакланып калган иң күптәнге юмористик журналларының берсе. Журналның беренче номеры 1923 елның гыйнварында чыга. Озын елларга сузылган тарихы эчендә ул бары тик Бөек Ватан сугышы елларында гына бастырылудан туктатылып тора. Беренче көннәреннән алып журнал татар телендә иҗат ителсә, 1957 елдан рус һәм татар телләрендә чыгарыла башлый.

Экспозициядә «Чаян» журналының 1920-1930 һәм 1941 еллардагы номерлары тәкъдим ителә, алар хәзер бик сирәк. Шулай ук төрле еллардагы редакция коллективы һәм «Чаян» рәссамнары белән архив фотоларын күрергә мөмкин булачак.

«Манеж» залларында XX-XXI гасырның күренекле рәссам-карикатуристлары: Э. Гельмс, И. Бобровицкий, П. Новичков, Э. Дышаев, Б. Старчиков, И. Әхмәдиев, Т. Фәизов, В. Бибишев, И. Азимов, И. Нәфиков, В. Шульпинов, А. Алешин һәм башкаларның эшләре белән танышырга мөмкин.

Хәзерге вакытта журнал үзенең иң яхшы традицияләрен – үзенчәлекле юмор, халыкчанлык, тормыш ахмаклыкларыннан оста итеп көлү алымнарын саклап кала алган. Шул ук вакытта, «Чаян» замана белән бергә бара, яңа көлкеле карашларны һәм темаларны үзләштерә.